Sy që nuk flenë: 20 qytete shqiptare nën vëzhgim 24/7!

Njëzet qytete të vendit do të pajisen me një sistem kamerash inteligjente, të cilat do të funksionojnë 24 orë në ditë. Qëllimi i projektit është rritja e sigurisë në komunitet, mbrojtja e jetës dhe pronës private, si dhe monitorimi i trafikut rrugor. 

Instalimi i pajisjeve ka nisur në Kamëz, Vlorë, Lezhë, Rrëshen dhe në një pjesë të Tiranës. Kamerat me rezolucion të lartë do të mundësojnë identifikimin e targave të automjeteve të shpallura në kërkim, regjistrimin e audios dhe kapjen e pamjeve të qarta edhe për persona të dyshuar që lëvizin në këmbë apo me automjet. 

Përzgjedhja e qyteteve është bërë nga Ministria e Brendshme në bashkëpunim me Policinë e Shtetit, bazuar në nivelin e kriminalitetit. Projekti do të kushtojë 60 milionë euro, ku një pjesë e konsiderueshme e financimit do të mbulohet nga Emiratet e Bashkuara Arabe.

📍 Qytetet e përfshira në projekt: 
Tiranë, Durrës, Kamëz, Kavajë, Krujë, Laç, Lezhë, Rrëshen, Shkodër, Elbasan, Pogradec, Korçë, Lushnje, Fier, Berat, Vlorë, Sarandë, Gjirokastër, Peshkopi, Kukës. 

Ky projekt pritet të sjellë një nivel më të lartë sigurie dhe kontrolli në zonat urbane, duke e bërë Shqipërinë pjesë të trendit global të qyteteve inteligjente.