ALARM! “Mashtrimi i Balerinës” mbërrin në Shqipëri: Si të mbroheni nga vjedhja e llogarisë tuaj në WhatsApp

Përdoruesit e WhatsApp në Shqipëri po përballen me një valë të re sulmesh kibernetike të njohura si “Mashtrimi i Balerinës”. Ky lloj mashtrimi (smishing) synon të marrë kontrollin e plotë të llogarive tuaja dhe të vjedhë të dhëna sensitive, duke përfshirë bisedat private dhe informacionet bankare.

Si funksionon skema?

Gjithçka nis me një mesazh që duket sikur vjen nga një person i njohur (shok, familjar ose koleg). Mesazhi zakonisht thotë:

Përshëndetje! A mund të ndani pak kohë për të votuar Sarën? Ajo është vajza e shoqes sime dhe fituesi merr një vit mësime vallëzimi falas. Është shumë e rëndësishme për të!

Mesazhi shoqërohet me një link. Sapo ju klikoni dhe plotësoni të dhënat që kërkohen në faqe, hakerat fitojnë akses në llogarinë tuaj. Rreziku shtohet sepse pasi vjedhin llogarinë tuaj, ata e përdorin atë për t’ua dërguar të njëjtin mesazh kontakteve tuaja, duke u bërë kështu një “zinxhir” mashtrimi shumë i besueshëm.

Rreziqet kryesore:

Sipas ekspertëve të teknologjisë, pasojat mund të jenë të rënda:

• Vjedhja e identitetit: Hakerat mund të hapin llogari të tjera në emrin tuaj.
• Aksesi në biseda: Mund të vidhen informacione konfidenciale ose foto private.
• Vjedhja e parave: Nëse keni të dhëna bankare të shkruara në biseda ose përdorni aplikacione financiare, rrezikoni humbje monetare.

Si të kuptoni që është mashtrim?

• Gjuha e përdorur: Shpesh shqipja në këto mesazhe është e gjeneruar me Inteligjencë Artificiale dhe ka gabime ose tingëllon e panatyrshme.
• Linku i dyshimtë: Emri i faqes (domain) zakonisht nuk ka lidhje me faqe zyrtare votimi.

Çfarë duhet të bëni për t’u mbrojtur?

Nëse ju ka mbërritur një mesazh i tillë ose keni klikuar linkun, ndiqni këto hapa menjëherë:

• Mos plotësoni asnjë të dhënë: Klikimi i thjeshtë i linkut zakonisht nuk është i rrezikshëm sa plotësimi i formularit apo dërgimi i kodeve që ju vijnë me SMS.
  
• Kontrolloni pajisjet e lidhura: Shkoni tek Settings > Linked Devices në WhatsApp dhe fshini çdo pajisje që nuk e njihni.
• Aktivizoni “Two-Step Verification”: Kjo është mbrojtja më e mirë. Shkoni tek Settings > Account > Two-Step Verification dhe vendosni një kod PIN. Kjo parandalon këdo që të hyjë në llogarinë tuaj edhe nëse ka numrin tuaj.
• Verifikoni me telefon: Nëse ju vjen një kërkesë e tillë nga një mik, merreni në telefon dhe pyeteni nëse e ka dërguar ai vërtet atë mesazh.

Kujdes: Siguria juaj online fillon me vigjilencën. Mos u bëni pre e “votimeve” të rreme që mund t’ju kushtojnë shtrenjtë!