Revolucioni i pagesave ne Shqiperi

Qeveria shqiptare ka njoftuar një nismë të re madhore për modernizimin e ekonomisë dhe reduktimin e parasë cash (fizike) në qarkullim.  Kryeministri Edi Rama bëri të ditur se brenda këtij viti, çdo biznes që operon në territorin e Republikës së Shqipërisë do të ketë detyrimin ligjor të ofrojë mundësi për pagesa elektronike.

Objektivi: Më pak cash, më shumë transparencë

Kreu i qeverisë theksoi se ky vendim shënon hapjen e një kapitulli të ri për ekonominë shqiptare. Qëllimi kryesor është luftimi i informalitetit dhe lehtësimi i transaksioneve për qytetarët dhe vizitorët e huaj, të cilët shpesh gjenden në vështirësi kur u kërkohet të paguajnë vetëm me para në dorë.

Sipas Ramës, bizneset duhet të përshtaten për të ofruar alternativa të ndryshme, siç janë kartat bankare apo aplikacionet e pagesave digjitale, në mënyrë që askush të mos jetë i detyruar të mbajë para cash me vete për të blerë mallra apo shërbime.

Qershor 2026 – Afati i parë për turizmin dhe transportin

Ndërsa plani përfshin të gjithë ekonominë, sektorët strategjikë të turizmit dhe transportit do të jenë të parët që do të preken nga ky ndryshim. Kryeministri vendosi një afat të prerë për këta operatorë: Qershor 2026.

“Deri në qershor, çdo biznes që operon në sektorin e turizmit dhe transportit do të duhet të garantojë forma alternative të pagesave për qytetarët. Jo vetëm cash, por edhe mjetet për të kryer pagesa elektronike.” u shpreh kryeministri.

Kjo masë vjen në një kohë kur Shqipëria po përjeton një fluks gjithnjë e në rritje të turistëve, për të cilët pagesat me kartë janë standardi i zakonshëm.

Shtrirja në të gjithë vendin

Pas fazës së parë me turizmin dhe transportin, detyrimi do të zgjerohet për të përfshirë çdo lloj biznesi tjetër brenda këtij viti. “Qytetarët dhe vizitorët duhet të kenë mundësinë të paguajnë me kartë apo me forma të tjera pagesash elektronike.” përfundoi kryeministri, duke nënvizuar se ky transformim do ta bëjë ekonominë jo vetëm më transparente, por edhe shumë më të aksesueshme për të gjithë.